Sizi regionun ən mötəbər və strateji əhəmiyyətli hərbi-texnoloji platformalarından biri olan “ADEX 2026” 6-cı Azərbaycan Beynəlxalq Müdafiə Sərgisinin açılışı münasibətilə Cənubi Qafqazın siyasi, iqtisadi və eksklüziv tərəqqi mərkəzinə çevrilmiş Bakı şəhərində salamlamaqdan böyük qürur və məmnunluq hissi duyuram.

Bu gün Azərbaycanın müdafiə sənayesi keyfiyyət, müasir texnoloji və elmi tutumlu istehsalat nailiyyətlərinin tətbiqi baxımından yeni bir mərhələyə qədəm qoyub. Azərbaycan Respublikasının Prezidenti cənab İlham Əliyevin həyata keçirdiyi məqsədyönlü və praqmatik dövlətçilik siyasəti nəticəsində ölkəmiz artıq sadəcə çağdaş texnologiyaların tətbiqçisi deyil, həm də qlobal təhlükəsizlik arxitekturasına fundamental töhfələr verən innovativ həllərin müəllifidir.

Möhtərəm Prezident cənab İlham Əliyevin “ADEX” sərgisinin təşkilinə və inkişafına göstərdiyi xüsusi diqqət bu unikal platformanı gələcəyin müdafiə doktrinalarının müzakirə edildiyi intellektual mərkəz statusuna yüksəltmişdir. Sərginin miqyasının ildən-ilə genişlənməsi, iştirakçı dövlətlərin və beynəlxalq şirkətlərin sayındakı davamlı artım Azərbaycanın hərbi-sənaye potensialına olan beynəlxalq etimadın əyani göstəricisidir.

Bu gün dünyada cərəyan edən proseslər göstərir ki, müasir dövrdə ölkələrin müdafiə qabiliyyəti və təhlükəsizliyinin etibarlı təminatı artıq kəmiyyət deyil, texnoloji üstünlük, süni intellektin tətbiqi və robotlaşdırılmış sistemlərin effektivliyi üzərində qurulur. “ADEX 2026” bu qlobal transformasiyanın mərkəzində dayanaraq, iştirakçılara ən mürəkkəb müdafiə ehtiyaclarına cavab verən intellektual sistemləri, kibertəhlükəsizlik həllərini və aerokosmik nailiyyətləri təqdim edir.

Bakı bu gün dünya müdafiə sənayesinin beyin mərkəzlərini, mühəndislik korpusunu və innovativ texnoloji yenilikləri vahid bir hədəf - daha təhlükəsiz və sülhpərvər gələcək naminə bir araya gətirən nadir məkanlardandır.

Bu sərgi həm də Azərbaycanın iqtisadi-hərbi gücünü və ərazi bütövlüyünü tam bərpa etmiş qalib dövlət kimi yeni imkanlarını bütün dünyaya nümayiş etdirir. Azərbaycanın müdafiə sənayesi hazırda xarici tərəfdaşlarla birgə istehsalat zəncirləri qurmaq, texnologiya transferini sürətləndirmək və müasir tələblərə cavab verən rəqabətədavamlı məhsullar ixrac etmək imkanlarına malikdir. Biz inanırıq ki, real təhlükəsizlik yalnız qapalı sistemlərlə deyil, həmçinin açıq və şəffaf beynəlxalq əməkdaşlıq, qarşılıqlı etimad və yeni elmi nailiyyətlərin tətbiqi ilə mümkündür.

Əminəm ki, sərgi çərçivəsində qurulacaq əməkdaşlıq və tərəfdaşlıq əlaqələri, keçiriləcək səmərəli işgüzar görüşlər, imzalanacaq strateji sazişlər və aparılacaq ixtisaslı müzakirələr hər bir iştirakçı ölkə və şirkət üçün yeni inkişaf üfüqləri açacaq, beynəlxalq təhlükəsizliyin gücləndirilməsinə, orduların müasirləşdirilməsinə və yeni nəsil müdafiə strategiyalarının formalaşmasına xidmət edəcəkdir. Bakının qonaqpərvərliyi və yaradılmış əlverişli işgüzar mühit sizin fəaliyyətinizə əlavə stimul verəcək, “ADEX” markası isə qlobal hərbi-texniki əməkdaşlıq tarixinə yeni uğurlu səhifələr yazacaqdır.

Bütün iştirakçılara yeni nailiyyətlər, qarşılıqlı faydalı tərəfdaşlıq əlaqələrinin qurulmasını və bol müvəffəqiyyətlər arzulayıram!

Hörmətlə,

Vüqar Mustafayev

Azərbaycan Respublikasının
müdafiə sənayesi naziri

Sizi 6-cı "ADEX-2026" Azərbaycan Beynəlxalq Müdafiə sərgisinin açılışı münasibətilə salamlayır, bütün iştirakçılara uğurlar arzulayıram!  

Əminəm ki, Bakıda keçirilən 6-cı “ADEX-2026” Azərbaycan Beynəlxalq Müdafiə sərgisi iştirakçı ölkələrin hərbi potensialının nümayişi, bilik və təcrübə mübadiləsi baxımından mühüm tədbir olmaqla yanaşı, mövcud hərbi-texniki əməkdaşlığın möhkəmləndirilməsi və perspektivlərin müzakirəsinə əhəmiyyətli töhfə verəcəkdir.  

Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin inamla yürütdüyü siyasətdə təyin edilmiş prioritet istiqamətlər regionda dayanıqlı sülhün qorunmasına, həyata keçirilən nəhəng iqtisadi və nəqliyyat layihələrinin təhlükəsizliyinin təmin olunmasına, həmçinin ölkəmizin müdafiə sənayesinin inkişafına xidmət edir.  

Hörmətli sərgi iştirakçıları!  

6-cı “ADEX-2026” Azərbaycan Beynəlxalq Müdafiə sərgisi təhlükəsizlik məsələlərin texniki həll yollarının müzakirəsi, hərbi sənaye kompleksinin müxtəlif sahələrində tətbiq olunan müasir müdafiə texnologiyalar ilə tanışlıq baxımından xüsusi əhəmiyyətə malik platformadır. Müdafiə sənayesinin inkişafına müsbət təsir edən belə sərgilərin keçirilməsi burada iştirak edən dövlətlərin istehsal etdiyi ən yeni məhsulların dünya bazarına çıxışına geniş zəmin yaradır.  

Azərbaycanın müdafiə sənayesinin inkişafına gəlincə, qeyd etmək istərdim ki, artıq ölkəmiz güclü müdafiə sənayesi potensialına malikdir. Hərbi zavodlarımızda müasir texnologiyaların tətbiqi ilə dünya bazarında rəqabət qabiliyyətinə malik mindən artıq çeşiddə müdafiə təyinatlı məhsulun istehsalı ilə paralel, döyüş maşınlarının, aviasiya vasitələrinin və digər hərbi texnikanın keyfiyyətli təmirini və modernləşdirilməsini mütəmadi olaraq həyata keçiririk.  

“ADEX-2026” beynəlxalq müdafiə sərgisində təmsil olunan ölkələrin sayının ildən-ilə artması onun bir çox dövlətlərin hərbi-sənaye müəssisələrinin diqqətini cəlb edən nüfuzlu beynəlxalq tədbir olduğunu bir daha təsdiq etməklə yanaşı, beynəlxalq arenada Azərbaycanın artan nüfuzunu da bir daha nümayiş etdirir. “ADEX-2026” sərgisi beynəlxalq əməkdaşlıq sahəsində qazandığımız uğurların vacib göstəricilərindən biridir.  

Qürurla bildirmək istərdim ki, Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin diqqət və qayğısı, həmçinin, Birinci vitse-prezident Mehriban xanım Əliyevanın davamlı dəstəyi sayəsində ordumuzun silahlanmasında yüksək texnologiyaların tətbiqi ilə hazırlanmış ən müasir silah-sursat və döyüş texnikası mövcuddur.  

Əminəm ki, 6-cı “ADEX-2026” Azərbaycan Beynəlxalq Müdafiə sərgisinin keçirildiyi günlərdə iştirakçı ölkələrin nümayəndələri və qonaqlar arasında aparılacaq görüşlər və müzakirələr hərbi və hərbi-texniki sahədə əməkdaşlığın daha da genişləndirilməsi üçün əlverişli zəmin yaradacaqdır.  

Hər birinizə sülh naminə gələcək işlərinizdə nailiyyətlər, ölkələrimizə əmin-amanlıq və tərəqqi, eləcə də sərginin təşkilatçılarına və iştirakçılarına qarşıya qoyulan məqsədlərə çatmağı arzulayır, uğurlar diləyirəm.  

Zakir Həsənov 

general-polkovnik  

Azərbaycan Respublikasının müdafiə naziri