Artıq ənənəvi xarakter daşıyan ADEX sərgisi müdafiə şirkətləri və sifarişçilər üçün uğurlu görüş nöqtəsinə çevrilmişdir. Tədbir dünyanın tanınmış müdafiə şirkətlərini öz çətiri altına alaraq müdafiə və təhlükəsizlik sahəsində texnoloji yeniliklərin geniş vüsət aldığı bir dövrdə ən müasir texnologiyalar və know-how, müasir silah və sursatın geniş çeşidini nümayiş etdirmək baxımından əhəmiyyətli beynəlxalq tədbirlər sırasında öz layiqli yerini tutmuşdur.

Ölkəmizin milli dövlətçilik ənənələrinin qurulmasında və inkişafında misilsiz xidmətləri olan dahi rəhbər, Ümummilli Lider Heydər Əliyevin müdrik rəhbərliyi ilə aparılan uğurlu daxili və xarici siyasətin layiqli davamçısı Azərbaycan Respublikasının Prezidenti, Müzəffər Ali Baş Komandan cənab İlham Əliyev tərəfindən müvəffəqiyyətlə həyata keçirilən islahatlar nəticəsində Respublikamızda müxtəlif sahələrdə böyük nailiyyətlər əldə edilmişdir. Digər sahələrlə yanaşı, ölkənin müdafiə qüdrətinin artırılması məqsədilə yaradılmış olan Müdafiə Sənayesi Nazirliyinin uğurlu inkişafı ölkə rəhbərinin müdafiə sənayesi sahəsində həyata keçirdiyi davamlı siyasətin və diqqətinin nəticəsidir.

Azərbaycan Respublikasının ərazi bütövlüyünün bərpa edilməsi istiqamətində Müzəffər Ali Baş Komandan cənab İlham Əliyevin müdrik rəhbərliyi altında Azərbaycan dövlətçilik tarixinin yeni səhifəsini yazan Qalib Ordumuz tarixi ədalətin və beynəlxalq hüququn bərpası istiqamətində apardığı 44 günlük Vətən müharibəsində qazandığı Şanlı Zəfərə Müdafiə Sənayesi Nazirliyi də öz töhfəsini vermişdir. Ordumuz parlaq qələbəsi ilə adını Azərbaycan tarixinin ən şanlı səhifəsinə qızıl hərflərlə əbədi yazdırdı. Bu qələbənin bir parçası olaraq, qürür mənbəyimiz olan Ordumuzu daha müasir silah və hərbi texnika ilə təchiz etmək, o cümlədən milli müdafiə sənayesinin və hərbi təyinatlı məhsulların yerli istehsalının gücləndirilməsi istiqamətində tərəfimizdən zəruri tədbirlər həyata keçiriləcəkdir.

Azərbaycan RespublikasıPrezidentinin dəstəyi və onun müntəzəm olaraq iştirakı ilə artıq dördüncü dəfədir ki, təşkil olunacaq ADEX sərgisi dünyanın dörd bir yanından bu sərgiyə qatılacaq dost və müttəfiq ölkələrin tanınmış hərbi sənaye müəssisələri, nüfuzlu xarici şirkət və təşkilatları üçün işgüzar əlaqələrin qurulması və yeni əməkdaşlıq sahələrinin yaradılmasında səmərəli platformadır.

Builki sərgi də milli müdafiə sənayesinin nailiyyətlərini nümayiş etdirərək iştirakçılar, ekspertlər və ziyarətçilər üçün yeni məhsullar və texnologiyalarla tanış olmaq məqsədilə son illərdə davamlı inkişafın təzahürünü əks etdirən geniş imkanlar yaradacaq, o cümlədən bilik, təcrübə mübadiləsinin aparılması, müttəfiq və dost ölkələrlə hərbi-texniki əməkdaşlığın gücləndirilməsi istiqamətində səmərəli işgüzar əlaqələrin qurulması, potensial müştərilərlə və təchizatçılarla qarşılıqlı sərfəli müqavilələrin bağlanması istiqamətində öz ənənəsinə sadiq qalacaqdır.

“ADEX-2022” sərgisində iştirak edəcək yüksək səviyyəli beynəlxalq hərbi nümayəndə heyətləri müdafiə sənayesi sahəsində yeni inkişaf meyllərini və istiqamətlərini nümayiş etdirəcək, eyni zamanda həm Azərbaycanın müdafiə sənayesinin, həm də geniş təcrübəyə malik nüfuzlu şirkətlərin rəqabət və qabiliyyətlərini təsdiq edəcəkdir.

Əminəm ki, tədbir təhlükəsizliyin qorunmasında, bütün “ADEX-2022” iştirakçıları ilə yeni işgüzar əlaqələrin qurulmasında və əməkdaşlıq imkanlarının yaradılmasında öz töhfəsini verəcəkdir.

Bir daha qürur hissi ilə sərgi iştirakçılarını Xəzər dənizinin sahilində yerləşən heyrətamiz Bakı şəhərində salamlayır və sərgi zamanı səmərəli işlər arzulayıram.

Qloballaşma prosesinin geniş vüsət aldığı və dinamik surətdə daim dəyişən dünyamızda dövlətlər intensiv şəkildə təhlükəsizlik çağırışları ilə üzləşirlər. Bu istiqamətdə həyata keçirilən tədbirlər sırasında hərbi və hərbi-texniki əməkdaşlıq, müasir texnologiyaların və təhlükəsizlik vasitələrin mübadiləsi məsələlərinin aktuallığı durmadan artmaqdadır.

Müasir Azərbaycan Respublikası öz müstəqilliyini qazandıqdan sonra uğurlu, lakin çox keşməkeşli inkişaf yolu keçmişdir. Əsası Azərbaycan xalqının Ümummilli Lideri, dahi şəxsiyyət və Ulu Öndər Heydər Əliyev tərəfindən qoyulmuş, hazırda isə Azərbaycan Respublikasının Prezidenti cənab İlham Əliyev tərəfindən səmərəli və uğurla aparılan daxili və xarici siyasətin nəticəsi olaraq, respublikamızda siyasi, hərbi və iqtisadi sahələrdə böyük nailiyyətlər əldə olunmuş, Azərbaycan beynəlxalq aləmdə öz sözünü demək iqtidarını qazanmışdır.

Müzəffər Ali Baş Komandan, Azərbaycan Respublikasının Prezidenti İlham Əliyevin rəhbərliyi altında 44 günlük müqəddəs Vətən müharibəsində qazanılan tarixi zəfər bu müdrik siyasətin məntiqi nəticəsi olmuşdur. Azərbaycan tarixinə qızıl hərflərlə yazılmış bu şanlı qələbə Azərbaycan xalqının əzmini, birliyini və qətiyyətini nümayiş etdirməklə yanaşı, gələcək nəsillərin qürur mənbəyinə çevriləcəkdir.

Dünyada və regionda cərəyan edən hadisələrin və Vətən müharibəsində qazanılan təcrübələrin nəticəsi olaraq, Azərbaycan müdafiə sisteminin möhkəmləndirilməsini, inkişafını və dövlətlər arası əməkdaşlığın inkişaf etdirilərək dərinləşdirilməsini daim öz diqqət mərkəzində saxlayır.

Azərbaycan Respublikası Müdafiə Sənayesi Kompleksinin yaradılması bu inkişafın əsas təzahürlərindən biridir. Yerli müdafiə sənayesi məhsullarının istər Azərbaycan Ordusu, istərsə də Silahlı Qüvvələrin digər hərbi birləşmələri tərəfindən müvəffəqiyyətlə istifadəsi qürurvericidir.

“ADEX-2022” 4-cü Azərbaycan Beynəlxalq Müdafiə Sərgisinin, tədbir çərçivəsində keçiriləcək görüş və müzakirələrin ölkələr arasında hərbi və hərbi-texniki sahədə əməkdaşlığın daha da genişləndirilməsinə və dərinləşməsinə uğurlu zəmin yaradacağına qətiyyətlə inanır, dünyada sülhün və təhlükəsizliyin qorunmasına öz töhfəsini verəcəyini əminliklə bildirir, faydalı və məhsuldar əməkdaşlıq üçün bütün dost və tərəfdaş dövlətlərə öz ehtiramımı ifadə edirəm.

Başda təşkilat komitəsi olmaqla, “ADEX-2022” 4-cü Azərbaycan Beynəlxalq Müdafiə Sərgisinin müvəffəqiyyətlə həyata keçirilməsi istiqamətində əməyi keçmiş hər kəsə səmimi təşəkkürümü ifadə edir, iştirakçısı olduğunuz tədbirin hərbi və hərbi-texniki əməkdaşlıq məsələlərinin müzakirə olunduğu nüfuzlu məkan qismində müasir təhlükəsizlik çağırışlarına cavab verən yeni yanaşmalara yol açacağına və yeni imkanlar üzə çıxaracağına inanıram.

Bir daha qürur hissi ilə sərgi iştirakçılarını salamlayır və tədbirin uğurla həyata keçirilməsini arzulayıram.